Білім айнасы Республикалық газет Бекмұратова Индира Ержанқызы
КМҚК «№177 бөбекжай-балабақшасы» әдіскері
№177 бөбекжай-балабақшасында ұлттық мереке кең көлемде тойланды
2025 жылдың 4 сәуір күні №177 бөбекжай-балабақшасында көктемнің жаршысы, жақсылық пен жаңарудың бастауы — Әз-Наурыз мерекесі жоғары деңгейде аталып өтті. Бұл мерекелік шараға балабақша ұжымы, тәрбиеленуші бүлдіршіндер, ата-аналар және арнайы қонақтар белсенді қатысып, нағыз ұлттық рух пен салт-дәстүрлердің ұлықталған керемет күн болды.
Балабақша ауласы мен ішкі сахнасы ұлттық нақышта безендірілді. Киіз үйдің макеті, оюлы текеметтер, сан түрлі әшекей бұйымдар мен ұлттық ыдыстар – бәрі де мерекенің шынайы келбетін ашып тұрды. Көктемнің лебі сезілгендей, айнала жарқын күлкі мен шат-шадыман күйге бөленді.
Мерекелік концерттік бағдарламада әр топ тәрбиеленушілері өз өнерлерін ортаға салды. Ұлдар ұлттық күрес, қой көтеру, гир көтеру, асық ату әдістерін көрсетсе, қыздар қазақтың мың бұралған биін орындады.
Балалардың тақпақтары мен көріністері ұлттық болмысты дәріптеді.
«Наурыз көже», «Бесікке салу», «Тұсаукесер» секілді салт-дәстүрлер сахналанып, бүлдіршіндер салт-дәстүрді өздері орындап, көрермендерге жеткізе білді. Бұл көріністер көпшіліктің жүрегінен орын алып, балабақша ұжымының дайындығына деген ризашылықты арттырды.
Ата-аналар – іс-шараның белсенді қатысушылары
Мерекелік шараның бір ерекшелігі – ата-аналардың да белсене атсалысуы болды. Олар ұлттық тағамдар жәрмеңкесін ұйымдастырып, наурыз көже, бауырсақ, қуырдақ, ет тағамдары, ірімшік пен жент секілді ұлттық дәмдерден дастархан жайды. Жәрмеңке барысында әр топтың дастарханы ұлттық стильде безендіріліп, қазылар алқасының жоғары бағасына ие болды.
Кейбір ата-аналар өз қолдарымен тіккен ұлттық киімдерін балаларына кигізіп, көріністерге қатысу арқылы ұрпаққа ұлттық тәрбиені берудегі жауапкершіліктерін сезіндірді. Бұл — ата-ана мен балабақша арасындағы тығыз байланыстың, тәрбиелік одақтың нақты көрінісі болды.
Іс-шара барысында №177 бөбекжай-балабақшасының меңгерушісі З:Ж.Дуйсенбаева сөз алып, барша қауымды Наурыз мерекесімен құттықтады. Ол өз сөзінде:
«Наурыз – халқымыздың жүрегіне жақын, дәстүр мен тарих тоғысқан мейрам. Біз бұл мерекені жас ұрпаққа таныту арқылы олардың бойына ұлттық құндылықтарды сіңіреміз. Бұл – болашаққа берілетін мол мұра», – деп атап өтті.
Сондай-ақ, балабақша ұжымына, ата-аналар мен балаларға алғыс хаттар табысталып, үздік өнер көрсеткен топтар мақтау қағаздарымен марапатталды.
Ұлттық сана – бала жадында
Мерекенің соңында балаларға тәтті сыйлықтар үлестіріліп, ата-аналар тарапынан жылы лебіздер мен ризашылық сөздері айтылды. Бұл күні тек мереке емес, рухани байлық, ұлттық бірлік пен ынтымақ, салт-дәстүрге деген құрмет те бірге тойланды.
№177 бөбекжай-балабақшасында өткен «Қош келдің, Әз-Наурыз!» мерекесі – бүлдіршіндердің ұлттық сана-сезімін оятуға, рухани жаңғыруға бағытталған тағылымды іс-шара болды. Осындай мерекелер жас ұрпақты қазақ халқының бай мәдениеті мен салт-дәстүріне құрметпен қарауға тәрбиелейтіні сөзсіз.
