Білім айнасы Республикалық газет 
Көк туымыз ашық аспан астында желбіреп, бейбіт күннің туғанына, яғни тәуелсіздік алғанымызға биыл тура 33 жыл толыпты. Жыл сайын республика көлемінде тойланатын ұлы мереке қарсаңында біздің №44 мектеп- гимназиясында «Ұмытылмас желтоқсан» атты мерекелік іс- шара өтті. Іс- шараның мақсаты — жас жеткіншекке тәуелсіздігіміздің қадір- қасиетін ұғындыру және батыр ерлеріміздің қанымен келген егемендігіміздің маңыздылығын бүгінгі ұрпаққа насихаттау болды.
Бұл бейбіт күннің бізге оңайлықпен емес, өлшеусіз ерен еңбекпен келгенін кеш қонақтары баяндап берді. Мерекелік кешіміздің қонақтары- Иманкулов Сәкен Жасұзақұлы, Исмаилова Майра Тұрсынқызы, Шорабаев Талғат Саптайұлы және Мустафина Гүлмира ханым болды, қонақтарымызды 9 — сынып оқушылары «Атамекен» әнімен қарсы алды. Мерекелік кеште бастауыш сыныптың білімалушылары «Туған Ел» патриоттық әнін шырқаса, биылғы оқу жылында ашылған мектеп – гимназиямыздың «Мельпомена» театр үйірмесінің қатысушылары алғаш рет сахнада «На пути к Независимости» қойылымын сахналады.
Кеш қонақтары білімалушылардың көкейіндегі сұрақтарына жауап беріп, кешіміз әдемі сұхбатпен жалғасын тапты. Кеш барысында тәуелсіз еліміздің тарландары, желтоқсан оқиғасының куәгерлері, аға — апаларымыз тәуелсіздік туралы, желтоқсан оқиғасы туралы біраз мәліметтермен бөлісті.
Білім беру ордамыздағы «Ерке» би үйірмесінің қатысушылары кеш барысында мерекелік кештің шырайын келтіріп, би билеп, өз өнерлерін ортаға салды. Мерекелік кешті мектебіміздің 7 «З» сыныптың балаларынан құралған «Жас сарбаз» ұйымының орындауындағы «Қазақстан- Егемен Ел» атты әсем әнмен аяқтады.
Жиын әсерлі, әуенді, мағыналы да маңызды кеш болып есте қалды. Қанша жыл өтсе де, тарих қойнауынан өз орнын алатын бұл күн — әрбір қазақ баласының жүрегінде мәңгі сақтаулы. Біз бейбіт күннің ұрпақтары сіздердің ерен еңбектеріңізді, ерліктеріңізді ешқашан ұмытпаймыз, желтоқсан оқиғасының куәгерлері! Елімізде әрқашан бейбітшілік болып, егемендігіміздің туы биікте желбіресін!
№44 мектеп- гимназия директоры
Мусагулова Салтанат Болгановна
