Білім айнасы Республикалық газет КМҚК “№72 бөбекжай-балабақшасының”
тәрбиешісі
Айдахметова Анар Соғысбекқызы
1 Мамыр – Қазақстан халықтарының бірлігі күніне арналған мерекелік іс-шара
1 Мамыр – Қазақстан халықтарының бірлігі күні – еліміздегі әртүрлі ұлт пен ұлыстың бейбіт өмір сүріп, достық пен татулықта тіршілік етуінің символы. Бұл мереке – көпұлтты мемлекетіміздің ең басты құндылықтарының бірі – бірлікті дәріптейтін күн. Осыған орай, КМҚК “№72 бөбекжай-балабақшасында” тәрбиеленушілердің қатысуымен тәрбиелік мәні зор, тәрбиеленушілердің ой-өрісін кеңейтетін мерекелік іс-шара жоғары деңгейде ұйымдастырылды.
Іс-шараны еліміздің мемлекеттік әнұранын шырқап, ерекше салтанатпен бастадық. Бұл – жас ұрпақтың бойында Отанға деген сүйіспеншілік пен патриоттық сезімді қалыптастырудың алғашқы қадамы. Әнұраннан кейін сөз балабақша меңгерушісіне беріліп, ол өз құттықтауында елімізде өмір сүріп жатқан барлық этностар арасындағы достық пен ынтымақтың, бейбітшіліктің маңызын атап өтті.
Іс-шараның негізгі бөлімінде балалар түрлі ұлт өкілдерінің дәстүрлі киімдерін киіп, сол халықтардың мәдениетін, салт-дәстүрлерін таныстырды. Ұйғыр, өзбек, татар, орыс, кәріс, түрік және қазақ ұлттарының биі мен әндері сахнада көрініс тапты. Әр топтың дайындаған нөмірлері көрермендердің ыстық ықыласына бөленді. Балалардың өнер көрсетуі арқылы әр халықтың мәдениетінің өзіндік ерекшелігі мен әсемдігі көрініс тапты. Бұл олардың бойына ұлтаралық сыйластықты, құрметті, және өз мәдениетін бағалауды сіңіретіні сөзсіз.
Балалар арасында ұйымдастырылған шағын қойылымдар, тақпақтар мен көріністер бірлік пен татулық тақырыбын терең аша түсті. “Бірлік бар жерде – тірлік бар” деген халық даналығын басты ұстаным етіп алған бұл шара, балабақша ұжымының ауызбіршілігі мен шығармашылық ізденісінің нақты көрінісі болды.
Мереке соңында барлық балаларға алғыс хаттар мен шағын сыйлықтар табысталды. Ата-аналар қауымы да балалардың өнерін тамашалап, өз алғыстарын білдірді. Іс-шара тәрбиеленушілердің жүрегінде үлкен әсер қалдырып, олардың ұлтқа, елге деген сүйіспеншілігін арттырды.
Қорытындылай келе:
Бұл іс-шараның мақсаты – еліміздегі әртүрлі ұлт өкілдерінің мәдениеті мен бірлігін көрсету, балалардың бойына толеранттылық, достық, ынтымақ, бейбітшілік сынды адами қасиеттерді сіңіру болды. Балабақша қабырғасынан бастап бала бойына осындай құндылықтарды дарыту – болашақтағы тату, мызғымас қоғамның кепілі. Ұйымдастырылған бұл мереке – Қазақстан халқының татулығын, бірлігін, көпұлтты қоғамдағы бейбіт өмір сүрудің қадірін ұғындыру жолындағы маңызды қадам болды.
