Білім айнасы Республикалық газет Алматы қаласы, Әуезов ауданындағы
№28 бөбекжай-балабақшасы
Меңгеруші: Суйенбаева Гульмира Муханбаевна
Ата-ана мен балабақша арасындағы алтын көпір: №28 бөбекжай-балабақшасында Ашық есік күні өтті
2025 жылдың 18 сәуірінде Алматы қаласы, Әуезов ауданындағы №28 бөбекжай-балабақшасында ата-ана мен балабақша арасындағы өзара серіктестік қарым-қатынасты нығайту мақсатында Ашық есік күні өткізілді. Іс-шара заманауи технологияларды қолдана отырып, тәрбиелеу мен оқыту үдерісінің ашықтығын арттыруды көздеді.
Ата-аналар шараға ерекше қызығушылық танытып, белсенділікпен қатысты. Олар балаларының балабақшадағы күнделікті тіршілігімен танысып, оқу-тәрбие жұмыстарының барысын көзбен көріп, тәрбиешілермен пікір алмасты. Әр топқа жеке кіріп, балалардың жасаған шығармашылық жұмыстарын тамашалап, ойын әрекеттеріне де қатысып үлгерді.
Ата-аналар не дейді?
Аяулым Бейсенбаева, Сәбиттің анасы:
«Мен үшін бұл күн өте маңызды болды. Баламның балабақшадағы күн тәртібімен танысып, тәрбиешілердің кәсіби жұмысына тәнті болдым. Осындай ашықтық пен сенімге негізделген байланыс үшін алғыс айтамын».
Мақсат Жұмабеков, Айзеренің әкесі:
«Бүгінгі шарада заманауи технологиялардың балабақшада қалай қолданылатынын көрдік. Ата-ана ретінде біз де осы үдеріске белсенді қатысуымыз керек екенін түсіндік».
Гүлмира Төлеуова, Рамазанның анасы:
«Балаларымыздың тәрбиесі мен дамуына барынша жағдай жасап отырған тәрбиешілерге ризамыз. Осындай кездесулер жиі болса, ата-аналар мен балабақша арасындағы байланыс одан әрі нығая түсер еді».
Балабақша ұжымы – кәсібиліктің үлгісі
Ашық есік күні барысында балабақша ұжымы өздерінің кәсіби шеберлігін тағы бір мәрте дәлелдеді. Балабақша психологы Расима Мусабековна балалармен жұмыс істеудегі әдістерімен бөлісіп, ата-аналармен психологиялық кеңес жүргізді. Әдіскер Жанар Маканбетовна оқу-тәрбие үдерісіндегі жаңа тәсілдер мен технологияларды таныстырып, ата-аналармен кері байланыс орнатты. Ал балабақша меңгерушісі Гүлмира Муханбаевна шараны жоғары деңгейде ұйымдастырып, ата-аналар мен ұжым арасындағы сенімді диалогқа жол ашты.
Шараның ерекшелігі неде?
Іс-шара аясында ата-аналар тек бақылаушы ғана емес, белсенді қатысушы рөлінде болды. Далада ұйымдастырылған түрлі ойын-сауық пен сұрақ-жауап алаңында да ата-аналар өз ойларын еркін жеткізіп, балабақша ұжымына ұсыныс-пікірлерін ортаға салды.
Сонымен қатар, заманауи цифрлық технологиялардың қолданылу барысы көрсетіліп, ата-аналарға арнайы платформа арқылы балаларының күнделікті жетістіктерін қадағалау мүмкіндігі таныстырылды.
Ашық есік күні – балабақша мен отбасы арасындағы өзара түсіністік пен сенімге негізделген серіктестіктің нақты көрінісі болды. Мұндай бастамалар балалардың дамуына, ата-аналардың белсенділігіне және тәрбие жұмысының сапасына оң ықпал ететіні анық.
