Бөлмеде ойналатын еркін ойын
Алматы қаласы Әуезов ауданындағы КМҚК «№154 бөбекжай-балабақшасында» мектепке дейінгі білім беру сапасын арттыруға бағытталған мазмұнды семинар-практикум өтті. «Бөлмеде ойналатын еркін ойын» тақырыбын негізге алған бұл іс-шара педагогтер мен әдіскерлер үшін тәжірибе алмасу алаңына айналып, заманауи білім беру талаптарына сай жаңа көзқарастарды қалыптастыруға ықпал етті.
Семинарға қалалық мектепке дейінгі ресурстық орталықтың әдіскері Туралина Жанар Анварбековна, аудандық әдістемелік кеңестің мүшесі Баткалова Жанат Шүкірбековна қатысты.
Қатысушылардың кәсіби құрамы семинардың маңыздылығын арттырып, мазмұнын байыта түсті.
Іс-шараның басты мақсаты — мектепке дейінгі ұйымдардағы заттық-кеңістіктік ортаны бағалаудың тиімді құралдарын таныстыру және ECERS-3 халықаралық шкаласын қолдану арқылы балалардың еркін ойын кеңістігін жетілдіру. Бүгінде баланың тұлғалық дамуы мен танымдық қабілеттерінің қалыптасуында еркін ойынның орны ерекше. Сондықтан педагогтар үшін ойын ортасын дұрыс ұйымдастыру — аса маңызды міндеттердің бірі.
Іс-шара балабақша меңгерушісі Абдыкалыкова Майгүл Еркасымовнаның алғы сөзімен ашылды.
Семинар барысында балабақша әдіскері Е.Р. Калыкова «Бөлмеде ойналатын еркін ойын» тақырыбында баяндама жасап, ECERS-3 шкаласының мазмұны мен құрылымын жан-жақты түсіндірді. Ол өз сөзінде бұл шкаланың балаларға арналған ортаның сапасын кешенді түрде бағалауға мүмкіндік беретінін атап өтті. Сонымен қатар, заттық-кеңістіктік ортаны ұйымдастыруда қауіпсіздік, қолжетімділік, әртүрлілік және баланың қызығушылығын ескеру қажеттілігіне ерекше тоқталды.
Теориялық бөлім тәжірибемен ұштастырылып, педагогтар түрлі ойын түрлерін көрсетіп, олардың баланың дамуына әсерін нақты мысалдар арқылы дәлелдеді. «Асығым – асылым» ұлттық ойыны балалардың мәдени мұраға деген қызығушылығын оятып, ептілік пен шапшаңдықты дамытса, «Менің дене мүшелерім» қимылдық ойыны арқылы балалар өз денесін танып, қозғалыс белсенділігін арттырды.
Ал «Өрмекші торы» ойыны ұжымдық әрекетті нығайтып, балалардың бір-бірімен қарым-қатынас жасау дағдыларын жетілдіруге бағытталды. Бұл ойын барысында балалар өзара байланыс орнатып, топтық жұмысқа бейімделеді. Музыка жетекшісі ұйымдастырған «Секір, ойлан, дәл түс» ритмикалық ойыны балалардың қозғалыс үйлесімділігін арттырып қана қоймай, олардың ойлау қабілеті мен зейінін дамытуға ықпал етті.
Семинардың келесі кезеңінде педагог-психолог И.Т. Искакова «Епті қол – жүйрік ой» тренингін өткізді. Бұл тренинг қатысушылардың шығармашылық белсенділігін арттырып, ойлау икемділігін дамытуға бағытталды. Педагогтар түрлі тапсырмалар орындау арқылы жаңа әдіс-тәсілдерді меңгеріп, өз тәжірибелеріне тың идеялар қосты.
Іс-шара соңында ұйымдастырылған кері байланыс барысында қатысушылар өз пікірлерін білдіріп, семинардың жоғары деңгейде өткенін атап өтті. Олар ECERS-3 шкаласын қолдану мектепке дейінгі ұйымдардағы білім беру сапасын арттыруға үлкен мүмкіндік беретінін жеткізді. Сонымен қатар, мұндай тәжірибелік кездесулердің педагогтардың кәсіби дамуына оң әсер ететіні ерекше атап өтілді.
Жалпы, аталған семинар-практикум мектепке дейінгі білім беру жүйесіндегі өзекті мәселелерді талқылап қана қоймай, нақты шешу жолдарын ұсынған маңызды алаң болды. Еркін ойын арқылы баланың жан-жақты дамуына жағдай жасау – бүгінгі күннің басты талаптарының бірі. Осы бағыттағы жұмыстар жүйелі түрде жалғасын тауып, педагогтардың кәсіби шеберлігін арттыруға өз үлесін қоса беретіні сөзсіз.
