Case-study Инклюзивті топтағы педагог шеберлігі - Білім айнасы

Case-study Инклюзивті топтағы педагог шеберлігі

Қазіргі білім беру кеңістігінде ізгілік пен тең мүмкіндіктер қағидасы алдыңғы қатарға шықты. Әсіресе мектепке дейінгі ұйымдарда әр баланың даралығын мойындап, оның толыққанды дамуына жағдай жасау – қоғамдағы өркениеттілік өлшеміне айналды. Осы тұрғыда «№139 бөбекжай-балабақшасы» коммуналдық мемлекеттік қазыналық кәсіпорнында өткен case-study форматындағы тәжірибелік іс-шара – инклюзивті білім берудің мәнін тереңінен ашқан мазмұнды алаң болды.
Іс-шараның басты тақырыбы – “Инклюзивтік топтағы педагог әрекеті”. Бұл тек теориялық баяндама емес, нақты тәжірибеге сүйенген, кәсіби пікір алмасуға құрылған, әр маманның өз ісіне жаңаша көзқараспен қарауына түрткі болған шынайы әдістемелік кездесу еді.

Балабақша әдіскері Нургазиева Айжан Калкеновна тақырпқа байланысты бүгінгі семинарға тыңғылықты дайындалып еңбектенгені көпшілікке көрініп ақ тұр. Ұйымдастырған әр істе орсан зор білім мен тағылымы мол еңбек жатыр.
Инклюзивті білім беру – тек ерекше білімді қажет ететін балаларды топқа енгізу ғана емес. Бұл – әр баланың ішкі әлемін түсіну, оның мүмкіндігін шектеу емес, керісінше, ашу. Сондықтан педагог әрекеті мұнда шешуші рөл атқарады.
Іс-шара барысында педагогтер, психологтар, тәрбиешілер, логопедтер мен әдіскерлер бірлесе отырып, инклюзивті топтағы жұмыстың өзекті мәселелерін талқылады. Қатысушылар күн тәртібі аясында ұйымдастырылған бөлімдер арқылы жүйелі тәжірибе алмасып, нақты әдістер мен тәсілдерді саралады. Шара қатысушылардың еркін атмосферада қарым-қатынас орнатуына мүмкіндік берді. Іс-шараның шымылдығы «№139 Бөбекжай-балабақшасы» КМҚК меңгерушісі Сабазова Сандугаш Самархановнаның мазмұнды алғы сөзімен ашылды.

Ол өз сөзінде бүгінгі білім беру кеңістігіндегі инклюзивті бағыттың маңыздылығына кеңінен тоқталып, әр баланың жүрегіне жол таба білетін педагогтің қоғам алдындағы жауапкершілігін айрықша атап өтті. Басшы ретінде ғана емес, тәжірибелі ұстаз, парасатты тұлға ретінде ол ұжымның бірлігі мен кәсіби ізденісін жоғары бағалап, осындай тағылымды кездесулердің педагогтердің шеберлігін шыңдаудағы рөлін ерекше ықыласпен жеткізді.
Іс-шараның негізгі өзегі – case-study әдісіне негізделген практикалық бөлім болды. Бұл кезеңде қатысушыларға нақты педагогикалық жағдайлар ұсынылып, оларды талдау, шешу жолдарын ұсыну жұмыстары жүргізілді. Инклюзивті топтағы педагог әрекетінің ерекшеліктері, балаға жеке тәсіл табу, топ ішінде қолдау мен тең қарым-қатынас орнату мәселелері жан-жақты қарастырылды. Case-study әдісі педагогтердің сыни ойлау қабілетін дамытып, теориялық білімді тәжірибемен ұштастыруға мүмкіндік берді. Әр қатысушы өз тәжірибесіне сүйене отырып, түрлі шешімдер ұсынып, ортақ қорытындыға келді.
Сонымен қатар, «Монтессоримен инклюзияның байланысы» атты практикалық бөлім ерекше қызығушылық тудырды. Бұл әдістеме арқылы баланың дербестігін дамыту, сенсорлық қабілеттерін жетілдіру және әр баланың өз қарқынымен білім алуына жағдай жасау жолдары көрсетілді. Монтессори тәсілінің инклюзивті ортада тиімділігі нақты мысалдар арқылы дәлелденіп, педагогтерге жаңа әдістемелік бағыттар ұсынылды.
Іс-шара барысында психологиялық қолдау мәселесіне де ерекше назар аударылды. Психолог маман ерекше баламен қарым-қатынас орнатудың тиімді жолдарын түсіндіріп, педагогтің эмоционалдық тұрақтылығы мен кәсіби төзімділігінің маңызын атап өтті. Бұл бағыттағы ұсыныстар педагогтердің күнделікті жұмысында туындайтын қиындықтарды жеңуге көмектесетін құнды тәжірибе болды.

Музыкалық сергіту сәттері іс-шараның мазмұнын жандандырып, қатысушыларға жағымды көңіл-күй сыйлады. Музыка арқылы ұйымдастырылған жаттығулар, музыкалық номерлер эмоционалдық жеңілдік беріп қана қоймай, топ ішіндегі өзара байланысты нығайтуға ықпал етті. Музыканың инклюзивті ортадағы рөлі ерекше екені тағы бір мәрте дәлелденді, себебі ол балаларды біріктіріп, еркін қарым-қатынасқа жетелейді.
Семинарға өзге де балабақша ұжымынан меңгерушілер, тірбиеші психолог педагоктер қатысып тәжрибе алмасты.
Жалпы алғанда, бұл іс-шара инклюзивті білім берудің мәнін айқындап, педагогтің тек білім беруші ғана емес, әр баланың дамуына ықпал ететін маңызды тұлға екенін тағы бір дәлелдеді. Инклюзия – бұл жай ғана әдіс емес, ол – жүрек жылуы мен кәсіби шеберліктің үйлесімі. Ал сол үйлесімді жүзеге асыратын – ізденімпаз, жаңашыл, жанашыр педагог. «№139 бөбекжай-балабақшасында» өткен бұл кездесу – осы ұстанымның жарқын көрінісі болды. Осындай мазмұнды шаралар педагогтердің тәжірибесін байытып қана қоймай, ең бастысы балаларға деген шынайы қамқорлық пен тең мүмкіндіктер мәдениетін қалыптастырады.