Бала көзімен табиғат әлемі
Табиғат — адамзаттың алтын бесігі, ал бала үшін ол — таңғажайыпқа толы шексіз әлем. Осы ұлы құндылықты бала жүрегіне терең сіңіру мақсатында ұйымдастырылған «Бала көзімен табиғат әлемі» атты аудандық семинар мазмұны жағынан бай, тәрбиелік мәні зор, ерекше әсерге толы іс-шара болды.
Семинар барысында қатысушылар бала тәрбиесіндегі табиғаттың рөлін жан-жақты талқылап, тәжірибе алмасып, жаңа идеяларға қанат қақты.
Іс-шараның алғашқы сәттерінен-ақ жылы атмосфера сезілді. Қонақтарды қарсы алу, тіркеу кезеңін тәрбиешілер Нусипова А.А., Батырбаева С.С., Маукенова Р.А. жоғары деңгейде ұйымдастырып, келген әрбір қатысушыға ерекше ілтипат көрсетті. Бұл – ұжымның кәсібилігін айқын аңғартты.
Семинар балабақша меңгерушісі Байбосынова Акмарал Алимтаевнаның алғы сөзімен ашылды.
Келесі бөлімде ұйымдастырылған іс-әрекет «Бала көзімен табиғат әлемі» тақырыбында тәрбиеші Жолдиева К.Т жетекшілігімен өткізілді. Мектепалды «Күншуақ» тобының тәрбиеленушілері табиғатқа деген сүйіспеншіліктерін шынайы түрде көрсете білді. Балалардың әрбір әрекеті, әрбір сөзі табиғатпен үндестікте өріліп, көрермендерге ерекше әсер қалдырды.
Тренинг барысында тәрбиеші Батырбаева С.С. «Баланың табиғатты қалай қабылдайтынын түсіну және қоршаған ортаға деген сүйіспеншілігін дамыту» тақырыбын кеңінен ашып, қатысушылармен бірге тиімді әдіс-тәсілдерді талқылады. Интерактивті жұмыс түрлері педагогтардың қызығушылығын арттырып, тәжірибе алмасуға мүмкіндік берді.
Семинардың маңызды сәттерінің бірі – әдіскер Ибрагимова А.И. ұйымдастырған балалармен сұхбат болды. «Табиғат және экология» тақырыбындағы балалардың ойлары олардың табиғатқа деген жанашыр көзқарасын айқын көрсетті. Балалардың таза, кіршіксіз пікірлері ересектерге үлкен ой салды.
Музыкалық бөлімде музыка жетекшісі Тілеген Н.Ә. мектепалды «Солнышко» тобымен бірге тамаша өнер көрсетті. Музыкалық оркестр мен домбыра сүйемелдеуімен орындалған би көрермендерге ерекше эстетикалық әсер сыйлап, ұлттық рухты сезіндірді.
Келесі тренингті тәрбиеші Нусипова А.А. «Энергияны қалай жұмсаймыз? Энергия алу және беру балансы» тақырыбында өткізіп, педагогтардың кәсіби және эмоционалдық күйін сақтау мәселесіне тоқталды. Қатысушылар өз тәжірибелерімен бөлісіп, пайдалы кеңестер алды.
Семинар соңында педагогтар мен қонақтар арасында пікір алмасу ұйымдастырылып, ашық диалог алаңы құрылды. Әріптестер өз әсерлерімен бөлісіп, ұсыныстарын ортаға салды.
Іс-шараның жоғары деңгейде өткені, мазмұнының өзектілігі ерекше атап өтілді.
Қорытындылай келе, «Бала көзімен табиғат әлемі» семинары тек тәжірибе алмасу алаңы ғана емес, жүректерді жақындатқан, ойларды тереңдеткен, шабыт сыйлаған маңызды кездесу болды.
Осындай мазмұнды іс-шаралар арқылы біз балаға табиғатты сүюді үйретіп қана қоймай, болашаққа деген жауапкершілікті де қалыптастырамыз.
